新聞﹕子華公佈舞台劇預告 Part 1
| 新聞列表 | |
| 瞓街排隊都要買飛！男神黃子華回歸舞台 | Eprice |
| 黃子華唔開棟>篤笑夥陳法拉演舞台劇 | now新聞 |
| 黃子華伙陳法拉演舞台劇 預告片曝光 | 明報 |
| 男神歸位！子華再踏台板孖法拉演舞台劇 | 東方日報 |
| 堅定流？子華法拉舞台劇飛話咁快有代購 | 東方日報 |
| 四年後再踏台板演新作 黃子華伙陳法拉做舞台劇 | 立場新聞 |
| 【對香港前景太悲】棟篤笑封咪兩年黃子華做舞台劇追陳法拉 | 蘋果日報 |
| 【棟篤笑之父】曾演4齣舞台劇 黃子華50場「男親女愛」創佳績 | 蘋果日報 |
| 【子華10金句（上）】埋嚟睇！子華「秋前算賬」點預示香港未來 | 蘋果日報 |
| 【子華10金句（下）】子華預言：二百零呎樓適合四人小家庭合用 | 蘋果日報 |
| 【子華再踏台板】網上代購小心有伏 索價每張訂金100蚊人仔 | 蘋果日報 |
| 【小強精神】子華自編自演做港產笑片冇諗住喺大陸上映 | 蘋果日報 |
| 【暫別棟篤笑】子華伴港人走過低谷 97‧沙士‧雨傘無一缺席 | 蘋果日報 |
| 黃子華預告新舞台劇 將與陳法拉首次合作 | 頭條日報 |
| 黃子華陳法拉7．1合演舞台劇未有劇名內部認購已截止 | 香港01 |
瞓街排隊都要買飛！男神黃子華回歸舞台
Eprice 2016.04.27
eprice20160427
http://timg.eprice.com.hk/hk/funky/img/2016-04/27/6840/uniqlo_1_19_316df89748cbec425d255d33baba17e0.jpg
要睇到男神黃子華嘅演出唔容易，要睇到佢上舞台更加難。近年已經唔再上台做棟篤笑嘅子華，昨日宣佈將會在今年重踏台板，不過係夥拍陳法拉做舞台劇。雖然暫時只得一條 1 分鐘嘅 Teaser，乜嘢詳情，包括劇名都未透露，但版主身邊唔少朋友已經講到明瞓街都要排隊買飛。跳轉睇下 Teaser 先啦！
Source: http://www.eprice.com.hk/fun/talk/19/6840/
黃子華唔開棟篤笑夥陳法拉演舞台劇
now新聞 2016.04.27
【now.com】香港真正稱得上「男神」的，周潤發、劉德華絕對是俵俵者，仲有一個叫黃子華。子華神向來工作都是貴精不貴多，當大家仲期待緊佢幾時再開棟篤笑，估唔到佢送咁大個驚喜畀大家，黃子華宣布將會演出舞台劇！
他昨日在Facebook放了一條舞台劇預告片，女主角竟是同樣久未在幕前現身的陳法拉！這個組合新鮮感十足，實在令人驚喜。預告片只交代了子華的老婆生前時僱用了陳法拉，但她一死，法拉便雜開了，並表示不想再見到子華，但子華表明一定會找她出來作個交代。
預告到此為止，劇名、公演時間地點一概未公布，但肯定掀起撲飛潮，大家儲定彈藥喇！
黃子華X陳法拉，超驚喜！
Source: http://news.now.com/home/entertainment/player?newsId=176947
黃子華伙陳法拉演舞台劇 預告片曝光
明報 2016.04.27
黃子華與陳法拉將首次合作演出舞台劇。
「男神」黃子華將與陳法拉合作演出舞台劇！黃子華今日凌晨在其facebook專頁分享一條題為「黃子華舞台劇2016 Part 1」的短片，短片長約1分鐘，黃子華、陳法拉分別現身獨白，黃子華說：「佢係我老婆請嘅」，透露二人曾是老闆與下屬的關係；陳法拉稱第一次見到他已知道「我哋有啲嘢」，黃子華續說：「我老婆死咗，佢就反而走咗，不負責任。」似乎是預告二人在劇中的關係糾纏不清。
陳法拉凌晨亦有在Instagram上載與黃子華的照片，她寫道：「我們第一次的舞台劇，Coming Soon!」不少網民留言大呼期待，他們寫道：「真係好期待啊！又要開始儲錢撲飛了」、「男神加女神，期待！」
不少網民期待黃子華與陳法拉的合作。（Instagram圖片）
陳法拉在Instagram表示將首次與黃子華合作演舞台劇。（Instagram截圖）
黃子華（YouTube截圖）
黃子華（YouTube截圖）
Source: http://ol.mingpao.com/php/showbiz3.php?nodeid=1461735589913&subcate=latest&issue=20160427
男神歸位！子華再踏台板孖法拉演舞台劇
東方日報 2016.04.27
子華今次唔係搞棟篤笑，而係事隔幾年再演舞台劇，但足以令粉絲瘋狂！
【on.cc東網專訊】 將棟篤笑演得出神入化嘅黃子華「子華神」，2016年終於有新搞作！佢尋晚就喺社交網站專頁上載咗條只有59秒、名為「黃子華舞台劇2016 Part 1」嘅短片，當中有佢同女神陳法拉嘅演出部份，但背景同氣氛都比較陰沉，連當中對話亦比較「灰」！
片段中一開頭出現嘅係法拉，之後就係子華嘅畫外音：「佢係我老婆請嘅…」然後條片就影住子華，然後係法拉嘅畫外音：「佢係我舊老板…」。之後，係一堆感覺既陰沉又唯美嘅畫面，而配合呢啲畫面嘅，係兩位主角不斷交接嘅獨白，先係法拉：「我第一次見到佢，我就知道有啲嘢」、然後輪到子華話：「我老婆死咗，佢就反而走咗，不負責任。」、再接住又係法拉：「我唔想再見到佢。」、之後又係子華：「佢唔喺度，我搵佢囉！」、再嚟係法拉：「咩都唔同使喇」、跟住又係子華：「我要一個交待、一個說法。」其實就咁用文字描述，真係表達唔到嗰種Feel，因為兩位主角無論係語調同表情都好到位，睇過條片，就知有幾咁震撼。
而呢條片嘅題，係詳細資料、稍後公布，簡單嚟講，即係賣關子，搞到子華迷同法拉迷都大叫頂癮，另由於條題亦標明係Part 1，所以粉絲都好期待咁問係咪好快會推出Part2，小編都想知喲！
最強娛樂APP《東網巨星》，不時推出最新最好玩娛樂節目，除了早前推出的特備節目《發哥有Say》、《黎明話你知》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！
最強娛樂APP「東網巨星」下載連結：
影片一開始見到好耐冇見嘅陳法拉！子華就話：「佢係我老婆請嘅…」
跟住法拉講：「佢係我舊老板…
然後各自有兩人獨白，成個畫面都好神秘！
「我老婆死咗，佢就反而走咗，不負責任。
「佢唔喺度，我搵佢囉！
「唔想再見到佢」、「乜嘢都唔同晒喇！」
「我要一個交待、一個說法。」
有Part1，係咪即係有Part2呢？
粉絲都表現得好興奮！
Source: http://hk.on.cc/hk/bkn/cnt/entertainment/20160427/bkn-20160427165427090-0427_00862_001.html
堅定流？子華法拉舞台劇飛話咁快有代購
東方日報 2016.04.27
心急還心急，大家都係睇定啲好。
【on.cc東網專訊】 「棟篤男神」黃子華又有新搞作！不過今次並非要開騷氹粉絲們開心，而係將夥拍同樣被封為女神嘅陳法拉，合作舞台劇。喺最新流出嘅宣傳片中，法拉同子華嘅獨白十分曖昧，感覺佢哋嘅關係相當耐人尋味。
而條宣傳片發表咗唔夠一日，網上已經驚現多個代購門票嘅渠道，只需100至200元人民幣（約120至240港幣）服務費，就可以搶先預購到呢個舞台劇嘅門票。不過由於呢個舞台劇嘅相關詳情，包括演出日期、甚至劇名都仲未曝光，令呢批預購渠道嘅可靠度成疑。
為免粉絲們誤墮買飛陷阱，《東網》向負責宣傳單位確認資訊，有關方面指目前尚未有任何網上預定或公開發售，建議法拉與子華的粉絲耐心等侯主辦方進一步公布門票資訊。
Source: http://hk.on.cc/hk/bkn/cnt/entertainment/20160427/bkn-20160427165427090-0427_00862_001.html
四年後再踏台板演新作 黃子華伙陳法拉做舞台劇
立場新聞 2016.04.27
邊個話黃子華只係做棟篤笑？繼 2012 年的《野豬》之後，他再踏台板，預告將於今年內，伙拍陳法拉演出全新舞台劇作品。
有「香港棟篤笑始祖」之譽的黃子華，周二透過其 facebook 官方專頁「黃子華 - 子華本部」，預告今日「有嘢睇」。果然，凌晨凌時，專頁上載一則題為「黃子華舞台劇2016 Part 1」的短片。
短片一男一女兩個角色，分別由穿著黑衣的黃子華與陳法拉飾演。二人關係曖昧，黃子華形容陳法拉，是「老婆請回來的」；而陳法拉雖然以「舊老闆」形容他，但直言「第一次見到就知道我哋有啲嘢」。
直至老婆離世，陳法拉也就離開了黃子華，黃子華批評她不負責任，出發去找她。然而，陳法拉卻說：「咩嘢都唔同曬」，黃子華堅持「我要一個交代，一個說法」。短片到此曳然而止，不禁引起觀眾猜想二人關係到底如何。
約一分鐘長的片段，未有透露新作的題旨，甚至演出日期、地點，至今仍然非常神秘。對於一眾視黃子華為男神的粉絲來說，光是陳拉法與黃子華的組合，便吸引不少留言表示「期待」、「有興趣睇」，甚至有網民直言「一定要買飛」。
早在 2000 年，黃子華將電視劇《男親女愛》的故事，搬上香港理工大學賽馬會綜藝館的舞台。其後，他亦不時演出舞台劇，其中包括：2008 年的《男磨坊ART》、2011 年的《咁愛咁做》、2012 年的《野豬》。今年新作將會是黃子華第五部舞台劇作品。
【對香港前景太悲】棟篤笑封咪兩年黃子華做舞台劇追陳法拉
蘋果日報 2016.04.27
棟篤笑嘅男神…公仔箱嘅收視王牌…電影票房毒藥…黃子華一向係網路男神，唔少fans都期待佢繼續搞棟篤笑，不過子華早前上過蕭若元嘅節目，講過香港社會已經令佢笑唔出，所以暫時「封咪」，黃子華稱呢一、兩年都未能把握到出棟篤笑，佢又稱：「我喺香港好多年，係一個地道香港仔，香港由一個我認識嘅香港，發展今日咁嘅香港，我點能夠說一個香港嘅故事，再做一次棟篤笑，喺一個咁嘅狀況，我諗好多嘢已經笑唔出，唔知點笑。」佢又指，本來想今年出棟篤笑，但對香港前景太悲，所以度唔出笑話。
子華暫時唔搞棟篤笑，咁佢會搞啲乜?「黃子華-子華本部」facebook專頁噚日先留言：「聽日有嘢睇！」吊吓fans癮，當fans叫晒「除褲!回水!」，噚晚專頁貼出一條1分鐘影片，原來係宣佈演舞台劇，追「高登女神」陳法拉，一齊演舞台劇，傳喺今年7月舉行。
片中一開始，畫面出現法拉個樣，子華話：「佢係我老婆請。」而子華就係法拉嘅老闆，法拉又話第一次見到子華就知大家有啲嘢，似乎講緊個舞台劇係一段「三角關係」。
畫面之後見「男神」子華講：「我老婆死咗，佢就反而走咗，不負責任。」不過法拉稱自己唔想再見到佢，認為佢哋關係一切已經唔同晒，之但係子華都冇放棄：「佢唔喺度，我搵佢囉!我要一個交待，一個說法。」
雖然成件事暫時未公佈幾時演、喺邊度演，但已經有「撲飛」潮，網上有人聲稱可以代購門票，睇嚟排隊黨已mon實，就知男神魅力沒法擋!!!
子華喺2000年拍過電視劇《男親女愛》，跟手食住個勢，出演50場《男親女愛舞台劇》，其後2008年演《男磨坊ART》、2011年演《咁愛咁做》、2012年演《野豬》，而今次佢同法拉合作，將係子華第5部舞台劇作品。
子華早前上蕭若元網台節目《蕭遙遊》
Source: http://hk.apple.nextmedia.com/enews/realtime/20160427/55034506?top=12h
#【棟篤笑之父】曾演4齣舞台劇 黃子華50場「男親女愛」創佳績
蘋果日報 2016.04.27
棟篤笑之父黃子華，噚晚就喺佢facebook子華本部到上載短片，話將會做舞台劇，現時只知人物有佢同陳法拉，官方仲未公佈時間、地點同票價，但網上已經掀起搶飛潮，真係子華一出，誰與爭鋒！
原來子華舞台劇嘅產量並不多，最經典嘅要數番佢同鄭裕玲喺千禧年做嘅《男親女愛舞台劇》，當年余樂天同Miss Mo呢對鬥氣冤家，創下48點嘅收視神話，佢哋原班人馬一齊做舞台劇，一開就50場，賺到盤滿砵滿！
8年後，黃子華就聯同鄧偉傑和陳淑儀，一齊做曾獲美國百老匯東尼獎「最佳戲劇」、美國紐約戲劇評論大獎「最佳戲劇」和法國莫里哀戲劇獎「最佳劇本」嘅舞台劇《男磨坊》，一共開咗16場。故事就講述三個情同手足的男性好友，因為其中一人用高價買了一幅現代派油畫後而引發的連串爭議開始，三個人的友情更因為價值觀、對藝術的認知與理解的不同而飽受重大的考驗。
2011年，子華就同當時仲未紅嘅白只、陳淑儀等人，一齊做咗17場嘅舞台劇《咁愛咁做》，而佢對上一次做舞台劇就係2012年同甄詠蓓、林嘉欣、同廖啟智合作嘅《野豬》，當時共開咗17場，唔知今次子華同法拉合作，又要演出幾多場呢！
Source: http://hk.apple.nextmedia.com/enews/realtime/20160427/55034589
【子華10金句（上）】埋嚟睇！子華「秋前算賬」點預示香港未來
蘋果日報 2016.04.27
男神黃子華覺得目前嘅香港令佢唔識笑，揚言兩年內，唔會再做楝篤笑，因為覺得香港人唔開心，所以今年轉同女神陳法拉演舞台劇。就等我哋一齊回帶重溫黃子華嘅經典楝篤笑「秋前算賬」，當中早就預示咗香港未來，套落今日政治環境字字回甘，原來好多嘢真係唔使等十年，男神請受小弟一拜。
預言金句一：過咗九七，香港唔會有被動嘅嘢出現。
事實證明由84年簽定中英聯合聲明簽定之後，香港人由「被動式」稱為「大陸收返香港」，變成「主動式」嘅「回歸」。早年李旺陽的「被自殺」的出現，到銅鑼灣書店幾位東主李波、桂民海都係「主動」用「自己方式」返內地協助調查，就知道香港人有幾主動，一啲都唔「被動」。
預言金句二：知唔知一國兩制最偉大地方係乜？就係肯承認佢自己個制，真係嚇親人！
當日鄧小平提出「一國兩制，港人治港，高度自治」，就是知道香港人接受唔到共產主義嗰一套。點知鄧伯伯兩腳一伸，新嘅領導人完全唔理香港人有幾難受，明明知道佢哋自己個制真係嚇親人，係要香港人接受。所以o依家咪搞到市民一反對就被稱「港獨」、「2047公投自決」嘅情況出現!
預言金句三：我識幾個幹部朋友，對我非常好，又請我食飯，又搵隻水警嚟請我遊船河！
子華提到因為認識幾位內地幹部，在內地睇醫生可奉旨打尖唔使等，排緊隊嘅人都唔敢出聲。呢一套喺回歸之後嘅香港越來越多，早有發展局局長陳茂波有劏房物業，繼而前廉政公署專員湯顯明用公帑，買茅台烈同內地官員狂歡。到近日梁特一家仲將「特權」呢樣嘢玩到出神入化，機場嘅「行李門」事件，引伸出龍蝦想硬闖禁區、囡囡遺留嘅行李可以唔使同行同檢嘅「特事特辦」。
預言金句四：如果我哋一齊唔生仔，暴政必亡
子華悲觀地以玉石俱焚嘅「唔生仔方式」嚟對抗暴政，佢明言：「為咗下一代，應唔應該有下一代？」佢樂觀地以為香港人冇下一代，中共就搵唔到人去管治。可惜，內地使出每日150個新移民配額，擺明「溝淡香港人」，仲創造出「新香港人」呢個偽名詞。
預言金句五：呢六、七百個名單（支持學運）緊要，識嘅拍一拍手！何鴻燊、李嘉誠……梁振英、曾鈺成。
子華攞出當年有份登報支持學運嘅名人名單來宣讀，仲講笑話：「如果真係有秋後算賬，我呢份嘢就值錢囉！」又有邊個諗到曾鈺成會成為立法會主席，梁振英仲不幸做埋特首。
Video is available below.
Source: http://hk.apple.nextmedia.com/enews/realtime/20160427/55034954
【子華10金句（下）】子華預言：二百零呎樓適合四人小家庭合用
蘋果日報 2016.04.27
面對住o依家嘅香港，有得講，你都未必夠膽講，就連子華呢個地道香港仔，佢都覺得唔認識目前嘅香港，頭先同大家睇過黃子華經典楝篤笑「秋前算賬」，點預示香港未來(新聞連結：http://bit.ly/1SroPB3)，目前再睇呢個騷仲講咗啲咩嘢咁爆。講真…好似社會物價咁貴，作為一個師奶仔都知家陣去買一餐餸絕對唔平，點知梁特仲可以同你講月入9,000元可以養活一家五口，就知呢個社會有幾離奇……
預言金句六：我係絕對唔會懷疑有一日能夠全民轉軚親中嘅能力！
港人功利主義，邊度有利益就會主動投誠，所以當年3年零8個月會有咁多漢奸。睇返今時今日藝人為咗搵人仔而敬禮，仲要放相上網驚死人唔知，老闆級嘅仲因為一部戲攞獎，而千方百計踩低創意貶低班導演，坊間「愛」字頭團體，四圍惹事生非，講到底咪又係利字當頭。
預言金句七：最近睇到報紙介紹二百零呎樓，適合四人小家庭合用。
子華當年戲言二百幾呎嘅樓都要住四人，感到不可思議，其實更離奇仲係梁特話一個清潔工，月入9,000元養活一家五口，仲要有錢剩嗰下離譜。
預言金句八：共產黨會尊重就嚟死嘅知識分子，所以為咗尊重會整到佢哋死死吓！
經歷過八九民運嘅人，都同意中共嘅手法有幾下流同卑鄙。曾參加六四嘅諾貝爾和平獎得主劉曉波，08年因起草《零八憲章》而犯咗「煽動顛覆國家政權罪」，被判有期徒刑長達11年，太太劉霞亦被無理軟禁監視。異見人士陳光誠一直受政治逼害，最終要遠走美國，近日的高智晟，也擬赴美目的是避開中共嘅虐待。
預言金句九：我認為喺香港任何人公開宣稱自己愛國，就等於公開宣稱自己係黑社會一樣，應該拉咗佢，真正罪名係「肉麻」！
呢句簡直說到不少人嘅心窩去，可惜依然有唔少人樂此不疲地「肉麻」，人前人後說愛國，教人點樣去愛。但抵死嘅地方係好多呢啲口中說「愛國」嘅「愛國人仕」，好似大家都要等埋嘅發叔劉皇發，叫人去少幾次日本就可以買樓嘅大劉仔劉鳴煒，身體卻很誠實地持有外國國藉。
預言金句十：有日有個四川農民嚟香港，然後同的士司機講去又一村隔籬嗰個二奶村！
中港兩地嘅人民被同化，隨住03年政府開放自由行，大批內地旅客來港消費，同時衍生好多問題，周圍大小便、覺得消費者就是「神」，劣幣驅逐良幣連帶上海嘅迪士尼樂園亦被大陸化。
Source: http://hk.apple.nextmedia.com/enews/realtime/20160427/55034964
【子華再踏台板】網上代購小心有伏 索價每張訂金100蚊人仔
蘋果日報 2016.04.27
「男神」黃子華喺2012年做完舞台劇《野豬》之後，直至今年，佢終於宣佈再做舞台劇喇!
噚晚子華喺facebook專頁公告開騷消息，貼咗短片「黃子華舞台劇2016 Part 1」，短短半日，喺YouTube已經有逾3萬瀏覽，雖然演出日期、舉行地點、票價全部未有正式公布，但話咁快網上已經有代購啦，仲要分別索價每張訂金100／50蚊人仔，搶錢呀！
大會方面暫時未公佈詳情，連舞台劇叫乜名都保密，但內地淘寶網好快手出現咗兩個代購，其中一個叫「黃子華香港舞台劇2016棟篤笑Dayo Wong Tze Wah唔黐線唔正常」！？
子華明明公佈今次係做舞台劇，但呢個淘寶就將舞台劇同棟篤笑拉埋一齊，仲用咗前年子華棟篤笑嘅騷名「唔黐線唔正常」，真係欺人太甚，係欺騙嘅「欺」，唔係欺負嘅「欺」，仲話演出日期喺7月10日！另一個叫做「黃子華 陳法拉 香港舞台劇2016門票Dayo Wong Tze Wah棟篤笑」，就話演出日期喺8月31日，唔知大家信邊個呢！
對於網上有代購收100蚊人仔訂金，黃子華舞台劇嘅大會發言人表示：「目前仲未有任何網上預訂或公開發售，煩請一眾子華同法拉fans耐心等候多幾日，我哋公佈咗之後，大家就會知道舞台劇嘅來龍去脈、門票價錢同日子，大家唔好信有網上預訂，其實除咗官方合作機構之外，冇其他途徑可以買飛，一切等公佈購票詳情才作準。」
Video is available below.
Source: http://hk.apple.nextmedia.com/enews/realtime/20160427/55034964
【小強精神】子華自編自演做港產笑片冇諗住喺大陸上映
蘋果日報 2016.04.27
男神黃子華出山，不過就唔係做強項揀篤笑，而係走去同女神陳法拉做舞台劇，原來除咗舞台劇之外，子華仲諗住同蕭定一合作拍一部喜劇。
冇錯，就係子華從來都冇成功過嘅電影範疇，大膽講句計往績，子華點都屬於票房毒藥之列，佢自導自演同郭羨妮合作嘅電影《一蚊雞保鑣》，當年無聲無息上映5日，票房得11萬元。
據聞今次佢只係負責自編同自演，o依家差唔多每日都喺蕭定一公司間房同監製陳穎倫開會度橋，在場人士形容佢哋每日度橋都笑到唔停得口，套片嘅定位會喺港產笑片，大陸冇諗住上。果然子華有種邊度跌低，要喺邊度企返起身嘅「小強精神」。
Source: http://hk.apple.nextmedia.com/enews/realtime/20160427/55036240
【暫別棟篤笑】子華伴港人走過低谷 97‧沙士‧雨傘無一缺席
蘋果日報 2016.04.27
男神黃子華同大家經歷1997年「秋前算賑」、講過2003年沙士、靚抽過2008年嘅金融海嘯、2014年選擇企喺「雞蛋」嗰邊講雨傘，喺香港所有大事上，佢嘅棟篤笑未曾離開過大家，或許大家總愛喺佢個騷上叫「除褲、回水」，其實有唔少fans係真心愛呢位「男神」，能夠幽默咁帶出港人生活嘅無奈，至少在社會上，夠膽講出社會嘅不公。
子華早前上咗蕭若元嘅節目，罕有講自己嘢，佢都好有興趣做多一次楝篤笑，但唔會喺呢一、兩年嘅事，因為佢做唔到：「我喺香港過咗咁多年，我係地道香港仔，o依家由我認識嘅香港發展到今日香港，我點能夠說一個香港故事，或一個我自己嘅故事，而同大家楝篤笑多一次。其實好多嘢笑唔出，唔知點笑，大勢係悲觀，人類從來都係悲觀嘅，作為一個香港人，我希望嚟緊一個騷，去總括一下自己。」表明呢兩年都會暫時「封咪」，佢想釐清香港未來點走，因為棟篤笑要摸得好準，自己先可以去講一個故事，子華亦多謝大家咁多年畀佢嘅滿足感，得到一啲香港人嘅「友誼」，容許佢講笑話。
前港大《學苑》副總編輯陳雅明今日喺facebook留言表示今日最sad嘅事係今年冇黃子華棟篤笑，讚子華以幽默伴隨香港人走過灰色低谷，寫道：「然而，今天連子華都講：『我諗好多野已經笑唔出。唔知點笑。』03年，黃子華還可以笑著對香港人搞gag：『各位，董特首，已經唔存在喇！』沒想到，只不過十三年，香港已經沉淪到子華神也笑不出的地步。誰都不能再自欺欺人，說這個社會一切如常。」
有網民就稱：「連黃子華都唔夠689好笑。」亦有網民表示：「生活已經荒謬過世上所有嘅笑話。」不過更多網民支持子華向電影及舞台劇發展：「可能佢覺得戲劇才有思想出路，永遠尋求突破，好欣賞!」
黃子華嘅棟篤笑陪伴唔少香港人走過低谷…
2003年沙士…令大家記得洗手、洗手、洗手!
2014年選擇企喺「雞蛋」嗰邊，同大家講「雨傘」。
Source: http://hk.apple.nextmedia.com/enews/realtime/20160427/55036240
黃子華預告新舞台劇 將與陳法拉首次合作
頭條日報 2016.04.27
陳法拉與黃子華將首次合作。
神黃子華一直專注舞台演出，日前他於facebook推出新一齣舞台劇預告片，片中卻驚現陳法拉將與子華合作，令一眾網友感到非常期待。
子華先於昨日在專頁故作神秘地表示「聽日有嘢睇！ 」，讓網友緊張得牙癢癢，直至今日凌晨，子華終於推出舞台劇預告片。短片一開首就見到法拉身穿黑衣遙望遠方，子華以「我老婆請佢返嚟」形容法拉，法拉則稱子華為「舊老闆」。法拉其後再在獨白中指「第一次見到就知道我哋有啲嘢」，兩人將在劇中有曖昧關係。
預告片未有透露舞台劇公演日期、地點等細節，但不少網友已表示準備撲飛：「又！係！時！候！搶！飛！ 」、「兩個都是我的超級偶像 ！ 正呀 ！ 」，亦有網民指仍然期待子華做棟篤笑：「我呢啲日子不斷重睇你啲冇碳用呀嗰啲，就快背得出你講過啲嘢」。
Source: http://hd.stheadline.com/news/realtime/ent/1064037/
黃子華陳法拉7．1合演舞台劇未有劇名內部認購已截止
香港01 2016.04.27
黃子華與陳法拉，你有聯想嗎？如果以前沒有，也許今天開始你就要為購買他們一起演出的舞台劇門票而煩惱了。
4月26日，在YouTube上「黃子華Dayo Wong棟篤笑－官方頻道」，發布了「黃子華舞台劇2016 Part 1」的一段短片，片中的人物有2個，就是黃子華和陳法拉。據知已有2年沒有演出棟篤笑的子華，靜極思動，但不是演棟篤笑，而是與陳法拉合作演出一個英國著名的舞台劇，子華十分喜歡這個劇本，還特別飛到英國傾談版權。子華對上一次演出舞台劇已經是2012年與廖啟智、林嘉欣合作的《野豬》，由莊梅岩編劇，為當年「香港藝術節」重頭節目，一開售即爆滿。
網上短片中，子華、法拉似有情又無情，子華最後的一句對白是：「我要一個交代，一個說法。」粉絲當然希望子華快點出來有個說法交代，好等知道如何度期放假買票睇戲，但你急佢唔急，短片寫明Part 1，顯然尚有Part 2，甚至更多！不過，早在年初記者約黃子華做訪問，對方即表示，待5月子華才會接受訪問。據知，今次舞台劇在5月才會有公布，身在外國的法拉也會回港，而「黃子華舞台劇2016」會在今年的7月1日至7月21日演出，最貴的門票是880元，不過內部認購已在3月30日截止，據知認購反應良好，連名字都未有的舞台劇都可以令人趨之若鶩，就只有黃子華做得到！
留言列表
子華市政局 (資料) (1)
