~*~oLi in Dayoland~*~

新聞﹕子華2016.04.18作客《謎米--蕭遙遊》Part 2

【蕭若元係恩人】提議做喜劇狂熱啲 子華演《男親女愛》爆紅
蘋果日報 2016.04.27

 黃子華早前上《蕭遙遊》節目，講自己人生其中兩個恩人係蕭若元同黃霑，子華稱同蕭若元有段淵源，見蕭若元話做到5月23號唔做，所以子華先上嚟報恩，佢稱以前有好多節目搵佢，佢都百分之百推晒。

子華回想1999年有個朋友介紹佢去見蕭若元，指子華做極都紅唔到，話搵蕭若元點條明路，叫佢做喜劇演技嘅方向，當時子華好感激對方，過咗幾個月，佢就演劇集《男親女愛》，個角色要求係無端端好high，引證蕭生畀佢嘅建議，余樂天呢個角色幾成功，所以蕭生係佢嘅恩人，蕭若元亦稱：「其實我好尊重子華，其實香港以前係冇楝篤笑，佢堅持一條友搞揀篤笑，搞到佢o依家最發，因為佢喺紅館搞而個台係全世界最細，無人坐到咁多位。」

不過，子華笑言：「我阿媽同我講，你真係羞家，個台咁細，劉德華個台都成個嘢，我要不斷解釋我用唔到，我嘅實用空間係咁多，夠我企就夠，我又冇人出嚟跳舞。」節目中講到黃霑，子華續道：「霑叔係另一個對我有恩嘅人，我第一次做楝篤笑之前，佢由我舊老闆認識我，約我去飲茶，攞咗好大楝書，畀我攞去睇，呢方面係我恩人。」

被子華稱為恩人嘅蕭若元，當年係點樣「點化」？蕭若元話：「子華做戲用一種比較冷嘅方法處理。」子華就話佢提出應該狂熱啲，蕭若元解釋：「我做主持都提高啲，有半點興奮，當你好冷時，個人投入度係唔夠，應有冷同有熱嘅acting，我當日只能夠畀到呢啲意見佢。」

蕭若元講到近年會拖住媽咪睇電視，同老婆仔女孫講「我愛你」，子華話：「呢個我自己都做唔到，我睇外國片就有，開口埋口就I love you，我已經好叻，會錫吓阿媽。」 

Source: http://hk.apple.nextmedia.com/enews/realtime/20160427/55035323

黃子華鼓勵年青人要有目標：唔好諗住有間公屋就發達
蘋果日報 2016.04.27

 黃子華日前為咗報恩，上咗蕭若元嘅節目，問佢點可以堅持做楝篤笑，子華回應：「首先呢樣嘢搵到食，我嘅電影大家都睇唔少，好多神神化化，冇一套收得，主要養住我係靠楝篤笑、係我主業。要鼓勵吓年青人，我都從來冇諗過買樓。」

子華又稱自己當年返香港嚟第一份工，去代課又做、TVB編劇又做，當時已經有同學搵緊一百萬元一日：「嗰啲係佢夢想，我嘅人生就要精彩，咩叫精彩，就係當時你有咩想做，你做到咪就係精彩囉!我唔係周潤發接班人係邊個呢？你喺追尋夢想之間會發現好多現實，現實就會將你嘅夢想劈同削去，某個地步話畀你聽，你個夢想係唔係可以改變一啲，你嘅夢想唔應該同世界脫咗節，又去搵嗰個夢想。」

蕭若元問到子華覺唔覺得自己靚仔？子華諗都唔使諗就話：「冇嘅，有人咁同我講都唔信，我瀨過嘢﹗」子華回想過往喺節目中曾為外籍美男子伴舞，子華講年輕人唔應該諗住買樓，亦都唔好諗住有間公屋就發達，不過子華都認同做人set個目標要高啲，問點解我唔係李嘉誠，又或者做到蕭若元都好，冇理由要降低水平。

黃子華喺《蕭遙遊》節目中，向蕭若元提問有關現今政壇，講到到中港話題，子華話：「我某程度度楝篤笑，要好耐先度到，有時想講啲嘢其實好悲，諗落不如唔好講住，點解要向大家散佈啲咁悲嘅思想」。怇又指上次講楝篤笑將中港問題形容係「婆媳關係」，佢話大家係不知不覺跌入惡劣「婆媳關係」，反問如果大家嘅媽媽唔鍾意自己個老婆，就會知道要化解係難度。

另外，子華又講到自己多年際遇總算可以；「我覺得我際遇係ok，出乎我意料有好多，最先想做羅拔迪尼路呢啲性格演員，都幾難，其實我係得，但係冇人畀機會我，我都唔會畀機會自己。我做過溥儀，都頂唔順，當時有個唔識我嘅大陸演員，見到我個造型，話我生出嚟個樣就係做悲劇。」

Source: http://hk.apple.nextmedia.com/enews/realtime/20160427/55035617

【自認偏向變態】子華後生已想結紮 點解自己嗰個先係細路仔
蘋果日報 2016.04.27

 現年55歲嘅黃子華仍然保持單身生活，早前上《蕭遙遊》節目，佢就自爆後生嗰陣，已經建議醫生朋友幫佢結紮，子華解釋：「唔係每個人都要結婚同生仔，的而且確，我係偏向變態啲，我返香港冇幾耐，我就問個醫生朋友，不如幫我紮咗佢，佢話『嘩』，你等多幾年先啦!」

子華話嗰陣時已經覺得保良局咁多細路仔冇人要，點解自己唔去搵個嗰啲，點解自己嗰個先至係細路仔：「到今日為止，我唔抗拒呢啲，但我唔覺得每個人都需要，特別係好想要而得唔到，你必須要認識，世界好多種形態，好多悲劇來源於我達唔到呢種形態係悲劇，我攞唔到樓、搵唔到老婆、生唔到個仔就係悲劇，呢個你完全係受一種論術影響，其實世界有好多論術同時進行緊。」

子華指結婚生仔要講緣份，佢話：「我又冇試過意外瀨咗嘢，有好多人瀨咗嘢唔生唔得，我相信我父母都係一時之快先至生。我有個偶像，佢話一係生仔，二係寫書，有書寫上留存，或肉體上留存，有思想上留存都好犀利。」

Source: http://hk.apple.nextmedia.com/enews/realtime/20160427/55035646