~*~oLi in Dayoland~*~

新聞﹕2016.07.14舞台劇《前度》觀眾大嗌引騷動 Part 2

陳法拉憂恐襲嚇餐飽張智霖諗定逃生
東方日報 2016.07.16

陳法拉與黃子華前晚演出時，在觀眾席有背包男突然大叫。

藝人張智霖（Chilam）前晚與太太及好友齊齊欣賞舞台劇，在難得的假期好好充電，但投入台上演出之際，在他前方的觀眾席突然來個「不速之嚇」！一名陌生男子突然起身並高聲尖叫，怪行引起全場注意，Chilam直言一度考慮帶同朋友離場！至於台上演出的法拉則擔心有人生命受到威脅，事後才懂嗌驚。

張智霖（Chilam）與太太袁詠儀（靚靚）、好友蔡一智與太太周雪芳等，前晚拍住拖為曾拍檔演出的陳法拉夥拍黃子華合作的舞台劇《前度》撐場，同場的星級觀眾還有呂慧儀及米雪等。眾人在開場前影大合照，準備開開心心睇騷，怎料在欣賞演出期間，觀眾席突發生騷動，台下有一名短髮年輕男子突然站起身，並驚呼：「等等！特種兵有冇嚟？」全場觀眾隨即被其奇怪舉動嚇得鴉雀無聲！而台上兩位主角的注意力亦放在該男子身上，該男子翻找背包後，隨即奪門而去！虛驚一場後，子華與法拉繼續演出，而Chilam等人在完騷後到後台與兩主角合照以示支持，似未有受驚。

被尖叫嚇呆
談到欣賞演出期間發生騷動，Chilam接受訪問時不願多談：「始終係人哋個騷，自己唔想講咁多啦！」經過多番追問，近距離目擊整個過程的Chilam才道出當時情況：「聽到尖叫聲我都呆一呆，第一時間望吓嗰個人，發現佢坐正我前面，係個單身男子，望到佢仲帶住個好似幾重嘅背包。」Chilam坦言有感該男子行徑奇怪，不禁多作設想：「當時都有諗定應變措施，如果佢走咗又冇帶個背包，我應該掟去邊度好吖？我仲諗定第二種方法，係咪要叫埋啲朋友齊齊走？好彩有驚無險，我哋都以為係劇情嘅一部分。」

「諗番都幾驚」
黃子華完場後在台上稱：「頭先自己以為有生命危險，嗰位觀眾問有冇特種兵喺度，唔通有領導嚟咗？自己都嚇一嚇，一度想叫停演出，多謝法拉咁淡定，順利完成演出。」

法拉亦說：「事後諗番都幾驚，突然有陌生人大叫，擔心會有人生命受到威脅，不過子華冇嗌停，所以我哋冇停落嚟，心裏面只係諗住『Show must go on！』加上當下係最深情嘅一幕，係一段喊戲，所以自己好快就專心投入繼續演出。」

陳法拉與黃子華定神後繼續演出。

張智霖（左起）、袁詠儀、黃子華、陳法拉、米雪與蔡一智夫婦在後台合照。

Source: http://orientaldaily.on.cc/cnt/entertainment/20160716/00282_001.html

怪男突襲舞台劇 子華：以為有生命危險
蘋果日報 2016.07.16

■黃子華及陳法拉前晚演出舞台劇《前度》時，遇怪男觀眾企起身大嗌，嚇呆全場！設計圖片

男神黃子華和陳法拉前晚繼續在灣仔演藝學院演出舞台劇《前度》，尾聲時，坐在張智霖（Chilam）和太太袁詠儀（靚靚）前面的男觀眾突然企起身大嗌：「特種兵有冇嚟？」全場嚇呆，子華曾想叫停，幸好法拉淡定，處變不驚，令演出不受影響，Chilam昨笑言曾誤會是劇情一部份，事後獲悉真相後覺得不可思議。

黃子華和陳法拉合演舞台劇《前度》，晚晚都吸引不同藝人撐場，前晚就有張智霖袁詠儀夫婦、「長腳蟹」呂慧儀、米雪及蔡一智等支持。不過前晚下半場卻發生突發事件，大約10時半左右，有一名年約20多歲男觀眾突然企起身大叫大嚷，嚇壞子華、法拉和台下觀眾，子華一度想叫停。
子華：一度想叫停演出

前晚演出尾段，有怪異狂迷突然企起身大嗌：「特種兵有冇嚟？」全場立時靜下來，跟着該名男子又坐低摷背囊，行為異常，他其後衝出門外離開現場，令當時在台上的子華和法拉都嚇呆了。由於男觀眾坐近Chilam、靚靚和呂慧儀，所以大家都受驚，工作人員待男觀眾離開後，馬上檢視他座位有否留下可疑物品，幸好沒發現，演出得以繼續。

■子華和法拉前晚演出，遇上男觀眾有異常行為，嚇壞觀眾，幸好兩人處變不驚。資料圖片

■呂慧儀和張智霖夫婦及蔡一智等前晚捧場睇騷，騷後入後台集郵。互聯網圖片

■呂慧儀昨在微博留言描述怪男大叫一事，大讚法拉及子華淡定。

子華在完騷時，不忘用這段小插曲做棟篤笑：「頭先自己以為有生命危險，嗰位觀眾問有冇特種兵喺度，唔通有領導嚟咗？自己都嚇一嚇，一度想叫停演出，多謝法拉咁淡定，順利完成演出。」法拉事後接受訪問時也說：「自己都有啲驚，唔知有乜事發生，好在冇事，當時自己演出深情一幕預備喊，子華唔叫停唔敢停，the show must go on。」法拉昨日再在微博留言：「電話鈴聲就晚晚有，昨晚卻是第一次遇到有觀眾站起來叫停，長知識了！哈哈。多謝觀眾一起那麼鎮定和入戲。」
呂慧儀：當時真係嚇一跳

Chilam昨日在電話中說：「尾聲最後5分鐘，坐我前一個位有個仁兄，大叫嗰句口號，我以為係劇情一部份，等緊台上子華法拉回應。」Chilam其後知道是會錯意：「原來係我誤會，係佢自己大叫，我都係第一次睇舞台劇遇到咁，呢單嘢幾不可思議。」
另外，呂慧儀昨午在社交網留言：「第一次睇舞台劇中途會有一個人在觀眾席大叫『等等！特種兵係咪嚟咗』，全場觀眾都呆咗……」她其後又再留言：「當時真係嚇一跳，即刻諗個台同嗰個人咁近，佢衝上台都有可能，有啲擔心！」
採訪：皓騫、鍾國仁

Source: http://hk.apple.nextmedia.com/entertainment/first/20160716/19697127