~*~oLi in Dayoland~*~

【約伍姑娘朝聖】法拉摸肚沾旺氣 大肚敏之睇騷肚仔打鼓
蘋果日報 2016.07.11

 陀B已4個月嘅陳敏之，之前已經爆響口會生小王子，預產期12月。

大肚婆前晚專登約埋契姐伍詠薇，去睇子華神同法拉嘅舞台劇，雖然已經有咗4個月，不過敏之個肚唔算好大，噚日着住衛衣嘅佢，直情唔多似係大肚婆，至於五官同手腳，亦唔覺有水腫跡象。

睇完騷，兩個契姊妹就齊齊入後台，搵子華神同法拉打吓卡，法拉仲摸吓敏之肚仔，沾吓旺氣。

事後敏之喺微博留言，話最鍾意見到法拉一路煮意粉一路演戲嗰幕，好自然，睇到佢個肚仔打鼓。

唔知……係咪b仔喺敏之個肚入面，演奏緊交響樂呢！

今日《蘋果》打畀敏之，佢就話特登捧法拉場：「好睇呀，呢套劇應該係法拉喺外國進修後返嚟首個演出，佢係完全唔同晒，好大進步，係一個好fresh嘅法拉。」敏之話陀B後，佢已經將家中所有高踭鞋收埋，改着平底鞋，以策安全，懷孕後佢話食量多咗，成日少食多餐，最鍾意食牛肉。問敏之打唔打算出去baby moon，佢話：「未plan，應該會，遲少少先諗。」準大姨媽伍姑娘就話：「敏之個肚脹卜卜，圓碌碌，但都一樣健步如飛。」

敏之同契姐伍姑娘，噚晚專登去搵子華神同法拉朝聖！

大肚婆隻腳都好仲好幼！

Source: http://hk.apple.nextmedia.com/enews/realtime/20160711/55343730

捧黃子華場 陀B陳敏之 睇到肚打鼓
都市日報 2016.07.12

陳敏之（右）孖住伍詠薇（左）去後台搵黃子華同陳法拉合照。

子華神（黃子華）的吸引力真係毋庸置疑，佢同陳法拉主演的舞台劇，每晚都有唔同的圈中人去朝聖。前晚就有大肚婆陳敏之孖住契姐伍詠薇捧場，完騷後呢對契姊妹齊齊入後台，搵子華神同法拉影合照，法拉仲摸住敏之個肚仔，沾沾旺氣。陀B已4個月的敏之，個肚唔算好大，着住件衞衣都唔覺似大肚婆，睇完騷敏之在微博留言大讚法拉好戲，仲話睇到佢個肚仔打晒鼓，敏之一早就已經爆響口話會生小王子，唔知B仔在媽咪肚入邊係咪跳緊舞呢！

Source: http://www.metrohk.com.hk/index.php?cmd=detail&id=313963