~*~oLi in Dayoland~*~

尋最真的黃子華  
新Monday 2003.02.17

文/顧燕雯  攝影/黃家活

黃子華好少做訪問，除非佢有嘢搞。3月，佢又會搞個人棟篤笑，於是又有機會搵佢傾偈。黃子華幫雜誌做專訪，平均一年一次，感覺上佢每年總係由project搞下。明明成3個幾月晚晚見佢係電視出現，但佢就話上年好黴。

外人既感覺，永遠都同實際情況有啲出入，就好似人人都覺得現實既黃子華等於《男親女愛》裡面既餘樂天，之但係實際上，佢一啲都唔餘樂天，而且仲相反得幾緊要。原來，大家都俾佢呃咗。

【2003.】尋最真的黃子華 - 在在26 - 勞勞亭外

我當阿媽7歲

為咗今年既個人棟篤笑，子華足足用咗兩年去籌備，加上佢自然溫溫吞吞既性格，最後搞到連同加拿大返嚟既阿爸阿媽食餐飯都差啲冇時間。

最難、最長都係做資料搜集同寫稿既過程，不過系咁o架啦，我有時要用一日諗一句嘢o架！要諗呢句係咪我想講既、好唔好笑、有冇新意、啲人明唔明……如果要改，又要諗點先可以改好啲，咁又一日。

呢段期間都推做好多約會呀！好似我老豆返嚟香港，佢好鐘意打golf，好想人哋睇佢表演，但我一次都唔得閑陪佢！

阿媽間唔中都有返嚟，佢當我係一個7歲既人，所以我哋之間有好大衝突，因為我又阿媽係7歲！我認為我知道我做緊啲乜嘢，我又認為佢知道我應該做啲咩o架嘛！但佢又調番轉咁諗，咁咪大家都認為對方係唔知自己做緊乜嘢咁囖！

佢都有六月我啲報道o架，我講得好咪開心囖，講得唔好咪擔心囖，不過佢而家覺得我好巴閉o架，成日叫我去加拿大做show，話：“而家係人度識你啦！你嚟就得o架啦！”但我同佢講唔係咁o架！識你唔等於要買飛睇你o架嘛！

唔enjoy做主持

睇子華做《一觸即發》做得幾開心，但佢話呢個job完全係一個意外，肯做係因為佢唔使用腦，而呢個階段根本唔會出現係佢既人生履歷裡面

坦白講，我唔特別enjoy做主持同遊戲介面，而《一觸即發》唔會係我人生既time table ，即係話將來有一日我要報到，我人生裡面係唔會有呢件事，所以佢既成敗我唔會放係心上。

邊啲係我履歷？《一蚊雞保鏢》啦，雖然票房僕街僕到飛起，但我係有心去做，做得唔好一件事。

仲有《溥儀》啦，拍《溥儀》時，基本上每個人見到我都要跪，我由一個咁既角色，拍到一日要係一個女人面前跪落嚟求去唔好同我離婚，你可以想像到呢個人醫生起跌之大，而且佢仲係一個真實人物，中間發揮既空間係作為一個演員夢寐以求既，就等於西方既《哈姆雷特》，所以男演員都想試一鋪。

好多人有誤解

雖然咁鐘意溥儀呢個角色，但子華話唔系好想佢嚟香港播，事關佢怕啲人當睇小強咁睇就弊，好多時，啲人誤會咗佢搞（）

拍《溥儀》係我最痛苦既時候，係非常、非常感凍同辛苦，精神同體力都焦脆，有一日，拍一個百幾人既場面，忽然耳邊聽到好大好大既聲，大到冇辦法接受到，終以崩潰喊出來嚟！啲人幾驚呀！

其實我唔係咁易喊，不過前幾日係屋企睇《不一樣的爸爸》都喊咗4次！可能冇防範啩！唉，都係軟弱o架啦！

啲人對我既誤解幾多，我唔出聲就有啲威嚴性，啲人以為我唔應該唔出聲。“啊！佢唔單止唔講笑，仲唔出聲添！咁就一定大鑊啦！”因為我唔係生成一個笑匠既樣，所以我唔講嘢你就覺得我黑面。但我唔出聲就係……因為唔出聲囖！我都算係一個cool既人o架啦，但係我cool係冇惡意既。雖然有一億個人話我寸，但都係我唔識既人啫。

有一次我撞到劉家良，佢話：“我有個朋友想打你一身喎！”我都莫名其妙，做乜無端端打我一身啫？可能我係電視俾人覺得寸啩！

見女仔會怕醜

曾經聽過一個有關子華即故事，內容大概係去出言“調戲”一位女士，令到對方之後見到佢都繞路走，但子華話呢件事既誤會成數好高。

我完全冇印象呀，我會唔會講呢啲嘢！not in such words。就算到今日，我對於女仔都係有啲怕醜o架，所以我懷疑會唔會有啲誤會呢？可能我讀男校，即係一方面有好鹹濕，一方面又好怕醜囖！所以我唔懷疑我夠唔夠下流咁做，而係夠唔夠膽咁做。

而且，呢個亦有關taste問題，即係去到邊度個程度會係bad taste。我覺得去到bad taste就係我失手o架啦！如果上臺我會故意踩過啲，睇下大家頂唔頂得順。生活上可能我怕醜囖，同埋我唔鐘意bad taste囖！

怕醜既程度呀……唔知呢，如果啲人10分鐘內做到既嘢，我要兩日囖。要睇清楚有冇第3個人睇到我既洋相咁，不過基本上追女仔係好多洋相。

唔做擠眉弄眼

朋友投訴、女友投訴，幕前既子華實在誤導太多人，例如請佢影好多唔同表情既相，佢其實唔多鐘意，因為佢話佢唔係咁睇自己，Sorry！查實我都只不過係一個一般觀眾，都會被誤導。

人哋以為我係喜劇演員，而一般人以為喜劇演員就係擠眉弄眼。基本上我做咁多套戲全部都唔係呢種，而係用角色去行，即係《男歌女唱》咁，係性格誇張，而唔係表情誇張。就算係餘樂天，你諗下一百集有邊一集係擠眉弄眼？

接觸過我既人話分別大？太多啦。俾人投訴？太多啦！女朋友都有啦！話覺得我好唔同呀！不過咁有better than 佢imagine既。好多人話：“你講嘢咁慢既？”同陌生人講嘢我會傾向慢啲，以為我想我講嗰樣係我mean嗰樣。好多人覺得我口若懸河，但其實唔係，我係鐘意慢工出細貨既人，呢個亦係點解我唔係特別enjoy做司儀同主持既原因。

究竟你明唔明

會發現佢講嘢時好鐘意問：“你明唔明呀？”據講成日問呢句既人通常因為欠缺自信心，但好難相信子華係呢種人，唯一解釋係呢個讀哲學既人，講嘢真係太深奧，要慢慢返去消化。

Source: http://sbinghe.blog.163.com/blog/static/16536809720151883435348/