~*~oLi in Dayoland~*~

新聞﹕子華為《大家樂》代言 Part 2

子華神變暖男 冧到網友暈晒浪！
東方日報 2016.05.18

子華神，冧死人呀！

【on.cc東網專訊】 「棟篤男神」黃子華最近出山幫連鎖快餐店拍廣告，「子華神」一出個個爭住睇！廣告上載咗唔夠一日就已經有41萬人次瀏覽，號召力驚人，拍得住天王黎明呀！加上個廣告拍到子華神成個暖男咁，男男女女都畀佢冧到暈晒浪！網民仲話：「睇嚟今次又有一大班港女去間餐廳度打卡啦！」

快樂在手上

其實個廣告嘅訊息主要係想帶出「只要肯伸出手，你會發現快樂就在手中」嘅道理，子華神喺個廣告入面化身「快樂幽靈」去偷偷哋幫身邊嘅人，例如偷阿婆個橙掉落地引個後生仔執番畀個婆婆，又或者喺對情侶嗌交冷戰嗰時，子華偷偷哋錫個男仔一啖，等個男仔以為係個女友錫番佢先，個男仔就自己波氹番女友！其實班網民除咗留意個廣告內容之外，最想睇嘅都係子華神，子華神喺廣告入面個形象勁跳脫可愛，大家仲話感受到佢滿滿嘅暖男氣質，仲有女網友話子華錫落個男仔度嗰幕睇到心都跳埋出嚟，直頭想子華啜自己10次添！

《藍天》重現

另外，由於子華今次係扮「快樂幽靈」，好似個透明人咁不斷幫人，有網民就話有啲靈異，仲話：「Ending應該係黃子華飄去燒味部舔叉燒」又有網友話：「以我咁多年睇戲嘅經驗，呢個黃子華應該係一隻鬼嚟！」不過，亦都有網民話個Like只係畀子華，唔係畀個廣告，仲話：「其實依家好多廣告，唔去到最後都唔知賣乜！」但提多一提，個廣告都有幾心思架，就係個背景音樂用咗《男親女愛》入面首主題曲《藍天》，不過今次就唔係子華唱，就搵咗另一把女聲唱，但係都聽到啲回憶出晒嚟呀！

網民有話兒:
Ryo Cxxx：以我咁多年睇戲嘅經驗，呢個黃子華應該係一隻鬼嚟！
Andrxx xxng：Ending應該係黃子華飄去燒味部奶（舔）叉燒
Loxs Laxxm：廣告因子華而美麗！
Achillexxx：球場果（嗰）吓應該會打架，你攞個波（省） 我！
Kxxxxi xxng：最尾個小妹妹好Cute，廣告公司同黃子華拍得好好！

子華提醒大家，要關心身邊嘅人呀。

幫多啲人，個人都開心啲呀！

好想做呢個男仔呀！

子華個樣真係勁得戚。

仲有網民話呢個子華一定係鬼！

廣告中嘅呢位妹妹好可愛呀。

Video is available below.
 

Source: http://hk.on.cc/hk/bkn/cnt/entertainment/20160518/bkn-20160518204303496-0518_00862_001.html

中環在線：黃子華搶青姐飯碗？
蘋果日報 2016.05.18

■黃子華化身暖男為大家樂做企業代言人。　YouTube截圖

「男神」黃子華今期唔做棟篤笑，轉做舞台劇，依然多人like，大家樂（341）睇中佢人氣旺盛兼「貼地氣」，新近搵咗佢做品牌代言人。咪住先，咁即係自2013年起，連續兩年幫品牌賣廣告嘅股評人胡孟青（青姐）被飛出局？
大家樂發言人回應話冇咁嘅事，佢解釋，青姐代言嘅係大家樂「超值午餐系列」，黃子華係幫企業代言，性質有少少唔同，日後或者仲有機會同青姐合作㗎。
至於點解搵黃子華做代言人，發言人指，佢出名做棟篤笑，啜核金句好受港人歡迎，好代表到香港文化，所以就一拍即合。
今次推出嘅廣告sell「快樂」，背景音樂好似好熟，如果有睇過黃子華出演嘅電視劇《男親女愛》，應該唔會覺得陌生，呢首歌正係黃子華嘅首本名曲《藍天》。
大家樂搵咗著名音樂人陳少琪嘅23歲大女陳明蘔（Jocelyn）主唱呢首廣告歌。發言人話，Jocelyn嘅聲線好fresh、配合到廣告，就連黃子華都讚好，仲話可以安心繼續做男神角色㖭！ 

Source: http://hk.apple.nextmedia.com/financeestate/art/20160518/19616406