新聞﹕子華為《大家樂》代言 Part 3－~*~oLi in Dayoland~*~

新聞﹕子華為《大家樂》代言 Part 3

新聞列表
子華拍廣告化身暖男	明報
快餐店廣告化身暖男快樂助人粉絲豎拇指Like子華正能量滿瀉	晴報
焗豬薄過紙皮大家樂邀黃子華拍廣告爆關公災難	蘋果日報

子華拍廣告化身暖男
明報 2016.05.19

黃子華化身暖男幫小女孩，讓身邊男士不要只顧玩手機。

黃子華在快餐店廣告中吻男生面頰，幫助對方與女友和好。

【明報專訊】黃子華最近為快餐店拍攝廣告，傳送快樂信息。他在廣告中化身暖男出手助人，如扮女生吻男生面頰，幫吵架的年輕男女和好，又幫小女孩將雞髀遞給掛住看手機的男士，令關係融洽。子華說出台詞：「無論係咪藍天，伸出手，快樂日日喺身邊。」

娛樂組

Source: http://www.mingpaocanada.com/TOR/htm/News/20160519/hk-mba2_r.htm

快餐店廣告化身暖男快樂助人粉絲豎拇指Like子華正能量滿瀉
晴報 2016.05.19

【晴報專訊】剛宣布舞台劇加場的黃子華，早前為大家樂拍攝廣告，化身暖男助市民做盡好人好事，宣揚尋找快樂的硬道理。短片在網上發布12小時已錄得逾50萬點擊，不少觀眾高呼廣告充滿正能量，加上男神發功實在冇得輸。
網上人氣高企的黃子華獲封高登男神，近年甚少拍廣告，除了合作多年的保險公司，就是去年的電訊商廣告了。早前他為快餐集團出山，以一身棟篤神探裝扮宣揚「快樂第一」的信息。短片全長約一分鐘，子華隱身成為快樂天使，靜悄悄助老婆婆、年輕情侶、學生哥及小妹妹等尋找快樂。廣告尾聲，萌爆的小妹妹更與男神擊掌，帶出「只要肯伸出手，自然會發現快樂就在手中」的道理。
今次廣告的背景歌是子華主演的經典處境劇《男親女愛》主題曲《藍天》，當年由子華親自填詞及主唱，今次廣告商就找來現年24歲、音樂人陳少琪的女兒陳明憙（Jocelyn）負責演唱，歌曲經改編後節奏輕快，予觀眾新鮮感。
速銷快樂輕鬆袋百萬
該廣告在大家樂fb專頁上載12小時已瘋狂洗版，並錄得逾50萬點擊率。不少網友Like爆男神送暖，大讚概念正又易明，高喊子華就是快樂的泉源。事實上，據知負責拍攝今次快餐店廣告的導演正是子華快將主演舞台劇《前度》的導演，男神可能收友情價演出，但估計酬勞亦最少過百萬。
另一方面，子華與陳法拉合演的《前度》將於七月公演，前日宣布加開至24場，門票於昨晨十時正式開售，約九時已吸引過百人在尖沙咀通利琴行排隊，兩小時內貴價票售罄，只剩下小量單丁位。不少網民亦嘗試登入快達票網購票，導致網站出現「系統繁忙」畫面，直至傍晚才回復正常；而所有門票在昨日亦已全數沽清。

廣告中，子華不惜主動錫男生一啖，令對方照辦煮碗氹回女友。（網上截圖）

黃子華在其fb專頁發布與《前度》拍檔陳法拉合照，答謝粉絲支持。（Facebook圖片）

撰文：Steven、Pat、Iris
編輯：黃寶恩
設計：鄧俊明
插圖：何樂

Source: http://millionaire.skypost.hk/%E5%A8%9B%E6%A8%82/%E5%A8%9B%E6%A8%82/20160519/002/%E5%BF%AB%E9%A4%90%E5%BA%97%E5%BB%A3%E5%91%8A%E5%8C%96%E8%BA%AB%E6%9A%96%E7%94%B7%E5%BF%AB%E6%A8%82%E5%8A%A9%E4%BA%BA%20%E7%B2%89%E7%B5%B2%E8%B1%8E%E6%8B%87%E6%8C%87Like%E5%AD%90%E8%8F%AF%E6%AD%A3%E8%83%BD%E9%87%8F%E6%BB%BF%E7%80%89/217022

焗豬薄過紙皮大家樂邀黃子華拍廣告爆關公災難
蘋果日報 2016.05.19

偉大嘅面書神，有時會令你起死回生。明蝠俠靠面書拆彈，坎坷過後有騷開，仲有情深咖啡未曾飲。短短一星期唔夠，條咖啡廣告片已累積3,906,144 views。

藝人本身形象好，加埋面書神嘅威力，效果自然相得益彰，但呢招唔係萬試萬靈。

噚日有一間連鎖快餐店(即係大家樂)嘅最新廣告出籠，廣告主角係男神黃子華。咁點解搵子華做代言人呢，品牌發言人就話佢出名做棟篤笑，啜核金句好受港人歡迎，好代表到香港文化，所以就一拍即合。

今次品牌推出嘅廣告sell「快樂」，男神喎，子華喎！雖然唔知佢係人定鬼(廣告中冇人見到佢，除咗個小妹妹之外)，但子華喺片中不斷插贓嫁禍，原來佢係用緊做壞事嘅方法去做好事、同你一齊尋找失物——搵返唔見咗嘅快樂！

Sell溫情，又有子華神坐鎮，子華神喎！今次一定冇得輸啦！大家樂噚日將條片放上官方facebook，一日內就有86萬次瀏覽，有2.9萬個like，有近過千留言，網民回應熱烈，但like係俾黃子華，負皮留言係俾大家樂。

又係一場關公災難。

成千個留言，幾乎一面倒插爆呢間快餐店食物質素差，員工態度差，衞生環境差。就連邵仲衡今朝都忍唔住喺facebook link咗呢條廣告，再留言話「關雲長大災難，睇留言得人驚！」其實大家樂嘅fb小編噚日傍晚時份已急急出嚟降溫，回覆大家:「好多謝大家好有愛嘅留言，我哋會繼續努力、繼續改善。」以為咁樣就能息眾怒？太天真。

網民喺呢個留言下面繼續留言再留言：「貴公司買起黃子華賣廣告都好，廣告幾好睇幾感人都好，有啲嘢根本改變唔到！」、「清潔做得唔好，小強一隻隻，搵男神拍廣告都無用！」、「建議參考前一田CEO莊偉忠，首先重點不在廣告，請以人為本。」等等等等。

成個Po截至今午一時，有1,027個留言，節錄部份：

1.讚廣告，插大家樂：
「隻炸髀難食到連個細路女都要搵老豆哽咗佢，完。」
「廣告一流，廣告客戶九流，人情厚，但你個焗豬扒飯薄過紙皮。」
「廣告係好，但俾嚿錢出嚟改善下整體質素先，尤其員工嗰邊，好難得你間間都可以咁差。」
「廣告個理念大致係行多一步，多點關心，與你們餐廳多年來的風格背道而馳，係咪曲線插自己呢？係就俾個like你。」
「大家樂用好多錢去搵子華做主角，廣告效果係幾好睇：不過呢間衰快餐店好多低下層小市民光顧，佢並無想過使錢去改善食物質素、份量、清潔同員工福利!」

2.插大家樂：(太多未能盡錄)
「食XXX，一定唔會特別快樂，食物質素越來越差……劣劣劣。」
「我細佬個陣都瀨過嘢，杯紅豆冰入面有曱甴！佢重話換過杯！有幾多人飲過真係……」
「成日都唔聲唔聲加價，上年仲係24元鮮油包早餐，加了幾次，現在已經27。」
「咁『大義』就減價啦! 最低工資做一個鐘都食唔到焗豬，食唔到焗豬又飲唔到嘢。」
「你哋青衣邨領展商場，嗰間嘢差到一個點，係嗰個電子屏幕餐牌睇完有嘅嘢，行埋去叫先同人講無，跟住先喺個電子屏幕餐牌度改番製作中或者賣晒，仲要多次投訴仍然無改善。」

3.講個廣告：
「以我咁多年睇戲嘅經驗，呢個黃子華應該係一隻鬼嚟。」
「男神好得，不過其實條tagline sell咩product都得」
「子華係正嘅，但睇完究竟關大家樂咩事呢？」

設計圖片