~*~oLi in Dayoland~*~

神交多年火花四濺
奸人誌﹕林嘉華撞奸人股噴鼻血
蘋果日報 2007.10.23

在近日熱播無劇集《奸人堅》中，林嘉華接棒做電視版第8代黃飛鴻，再演電視劇的原因，林嘉華坦言是為了黃子華，因「覺得同子華可以有出到。」結果新一代黃飛鴻跟奸人堅擦出火花之餘更出埋血，拍攝一場舞獅戲期間，林嘉華慘遭子華屁股撞穿鼻膜，上演了一幕如假包換的黃飛鴻血戰奸人堅。　第二回

拍攝舞獅戲時嘉華主動提議用面孔撞子華屁股，以增加搞笑效果，結果撞出鼻血來。　電視圖片

拍攝舞獅戲時嘉華主動提議用面孔撞子華屁股，以增加搞笑效果，結果撞出鼻血來。　電視圖片

關德興演繹的黃飛鴻，是經典中的經典，而過去曾在電影及電視劇中扮演此角色的，還有李連杰、趙文卓和譚詠麟等，輪到《奸人堅》的林嘉華，屈指一算已是電視版第8代。不過林嘉華扮演的黃飛鴻，既不像關德興般忠直，也不如譚詠麟般搞笑，而是一個戇直的新版本。
「一直好欣賞子華」

嘉華說：「將關德興黃飛鴻轉為喜劇人物係好好笑，譚詠麟當日做比較搞笑，我黃飛鴻係有少少戇直，佢一心導奸人堅向善，但俾對方搵笨都唔知種。」
早前嘉華為替《奸人堅》宣傳造勢，不惜公然親吻子華面頰，上演一幕古代版斷背山，原來林嘉華今次接演《奸》劇，也全因為一個黃子華，他說：「我拍呢部劇原因，一來覺得好過癮，二來呢個組合自己都好想試，覺得同子華可以有出到，我一直好欣賞佢，覺得佢好有才華。
「其實我同佢都有淵源，我係佢學長，大家都係讀聖若瑟。記得我同佢第一次接觸係電話度，沙士年佢去多倫多做騷，我加拿大做電台節目，同佢做個電話訪問。舊年我返香港拍《學警出更》，子華又去多倫多做騷，我都專登叫我太太送個花籃畀佢。直至拍《奸人堅》之前，葉童約埋監製、子華同我一齊食飯傾部戲，我先至第一次同子華見面，佢仲記得我送過個花籃畀佢，一見到我即刻話多謝。」
不過今次跟子華合作，嘉華不但擦出火花，原來還出埋血，他說：「有場舞獅戲，子華舞獅頭，我舞獅尾，劇本本來只係要我頂住佢，我話不如我成塊面隊埋佢屁股度啦，效果好似好，子華聽到之後即刻話：『呢就叫做演員道德啦！』次我直情隊到出埋血，因為佢一撞埋就撞到我流鼻血，子華猛話唔好意思，我話唔關事，我諗如果換轉子華係我，佢都會咁做。」
螢幕上黃飛鴻身手了得， fit到漏油，但螢幕下嘉華卻打到氣喘，他說：「雖然以前我拍過唔少動作戲，但話晒黃飛鴻都係一代宗師，我又冇武術底子，打起上都好辛苦，有時耍拳，手位差兩寸都要 NG，當然有唔少武打場面都會有替身，如果我話冇都係呃人。」

三角戀兩敗俱傷
黃師傅訓奸人堅，拳拳到肉，拍攝初期嘉華會就住來打，以免真的打傷子華，但子華為求效果逼真，自告奮勇在身上加護墊後實行讓嘉華毆個痛快，結果最後連嘉華也有樣學樣。他說：「子華叫我出力打佢，後來有幾場戲係奸人堅幻想自己點樣擊敗黃師傅，為效果好，我都墊等佢搏命打。同子華合作都有撞到出，大家拍時候都會有意見，我覺得成個氣氛好好。」

黃飛鴻系列故事，最後黃師傅例必打贏奸人堅，令對方痛改前非，《奸人堅》也不例外，至於二人與凌玉翠（葉童飾）之間的三角戀，黃飛鴻跟奸人堅最後原來兩敗俱傷。嘉華說：「黃飛鴻最初唔知乜叫愛情，佢只係為繼後香燈而結婚，同葉童相睇，葉童同奸人堅係家，佢係有愛過，但最後葉童係冇同到奸人堅或者黃飛鴻一齊。」
自創抵死宣傳片

其實《奸人堅》未推出時，宣傳片已先聲奪人，尤其嘉華扮70年代主持《警訊》的宣傳片更是抵死。原來這一條宣傳片，林嘉華也有貢獻，他說：「我加少少落去，我叫大家如果有奸人堅消息，可以飛鴿傳書畀我，跟住好多白鴿飛埋，原本安排係冇白鴿掟落我度，我見現場有咁多臨時演員，又有咁多白鴿，就建議導演不如搵班臨記一齊掟白鴿落我度，咁做法其實有兩個意思，第一係證明奸人堅真係好乞人憎，咁快已經有 feedback，第二係細蚊仔睇落會覺得好得意。」
採訪：戴彩煥　攝影：葉君海

傳奇小八卦：廣東十虎濟世為懷

家喻戶曉的黃飛鴻（1847─1924圖），生於廣東佛山，與其父黃麒英同為廣東十虎之一。黃飛鴻自小習武，曾設館授徒，並在廣州仁安里設寶芝林醫館，行醫濟世。黃飛鴻的徒弟林世榮後來移居香港，武術指導劉家良的父親劉湛便是其弟子。
黃飛鴻鋤強扶弱的精神受世人景仰，以他為主題拍攝的電影和劇集逾百部，關德興是扮演黃飛鴻的鼻祖，49年的首部黃飛鴻電影《黃飛鴻傳上集之鞭風滅燭》便是由他主演，他所參演的黃飛鴻電影逾70部，而扮過黃飛鴻的演員還包括劉家輝、成龍、李連杰及趙文卓等。

Source: http://hk.apple.nextmedia.com/entertainment/art/20071023/10325348