~*~oLi in Dayoland~*~

挾《棟篤神探》餘威 奸仔子華反撲影圈
蘋果日報 2004.08.08

雞髀當手槍，子華這個神探認真出位。

《棟篤神探》中的莫探員黃子華，在無綫平步青雲，但在影壇卻連番失利，他自導自演的《一蚊雞保鑣》票房仆直，但他未曾放棄，更一改戲路再闖影壇，在新片《阿孖有難》中演大反派。

我做反派，觀眾可能都係笑咋！

進軍影壇連番受挫，但子華未肯認輸。

黃子華

揚言不拍《棟篤神探》續集的子華，大讚蔡少芬（右）演技出色。 劇照

郭羨妮與子華在《一蚊雞保鑣》中演情侶，票房成績慘不忍睹。 劇照

事業篇：影壇失利當交學費
現已四十三歲的黃子華，因一部處境劇《男親女愛》而人氣急升，近日無播映的《棟篤神探》，更奠定了他冷面笑匠的地位。
子華在無甚吃得開，但轉戰電影卻落得慘淡收場，無論是他自導自演的《一蚊雞保鑣》，還是與影后梅艷芳合演的《男歌女唱》，票房成績也叫人慘不忍睹。似乎子華應將時間投資在電視圈，總好過在電影行業蹉跎。

大卡士唔一定收得
子華承認電影成績不及電視，但他卻未因為數字上的問題而就此罷休，他說：「電視睇收視，電影就睇票房，但係咪認輸呢？又係另一個問題，電影好講天時、地利、人和，好多大明星唔係套套戲都收得，冇一個一定得大卡士，要睇成個製作。係咪觀眾唔捨得畀錢睇黃子華呢？但棟篤笑成幾百蚊一張飛，重貴過睇戲，觀眾又一樣買飛睇！
「《一蚊雞保鑣》係我第一部自己執導電影，我拍完之後先知道，拍一部喜劇原來唔可以乜都理，而且我做商業電影原來係冇耐性，呢次就當係一個學習過程。」

見好即收拒拍續集
電影上的連番失利，令子華往後選擇劇本時也份外小心，近日他已推掉兩部擔正做主角的電影，寧願為鄭伊健與蔡卓妍主演的《阿孖有難》客串做大反派，因子華認為今次做大反派發揮較大，他說：「相信觀眾都想睇做大反派黃子華係點，可能到時我一出場，觀眾都係笑，但我唔會限制自己淨係做某一類型角色。」

近日收視高企的《棟篤神探》中，子華認為除蔡少芬外，蔣志光和魏駿傑亦演得很出位，若將來有機會定會爭取跟二人合作，不過，若無開拍《棟》劇續集，子華表示不會接拍，他說：「見好就收，就好似當年我做《男親女愛》一樣，而且演員應該試多唔同。」
不少演員埋怨拍電視劇過的是非人生活，但卻絕少聽聞子華在傳媒前呻過半句，他笑說：「我好佩服演員，如果換係我話，就一定死得！可能自己一世夠運，拍親劇通告都唔算太密，其實頂唔住可以休息，我自己就有限額，頂多連續拍三日三夜，而且開劇幾個月，我特登請個司機車。」

做老闆出碟話晒事
先後做過電視劇、電影及棟篤笑的子華，目前最大心願就是出唱片，但不是以他的個人名義出碟，而是他近日新組成的樂隊「哈痞」（ Happy），子華說：「今次係我自己做老闆投資，我唔傾其他唱片公司係因為唔想到時我作好歌，唱片公司又話呢首唔得、首要改，做老闆可以自己話晒事。」

感情篇：保護女友幾乎冇命
在幕前總是不解溫柔的黃子華，原來是相當細心體貼的男朋友，上周他為保護圈外女友免受狗仔隊追訪，不惜冒生命危險亡命飛車，幾乎三次墮進鬼門關。

拚命踩油衝燈
子華日前談及此事時仍有餘悸：「班狗仔隊係咁追住我哋，想知我哋住邊度，所以我搏命踩油衝紅燈，我一路踩油一路心諗『我今次做硬戴安娜（已故威爾斯王妃）』。」子華表示，他亡命飛車時，差點與巴士及小巴撼個正着，有三次死裏逃生的經歷，令子華不禁抹一把汗，他說：「如果唔係女友喺隔籬，我一定揸得重狼，不過無論你點避都好，到最後一定輸梗。」
其實子華的女友已經曝光多次，為何子華仍如此避忌？他說：「其實我冇問題，我入得呢行就預咗俾人影，但女友唔想，因為佢係圈外人，有自己嘅生活空間，如果成日俾人影相見報，咁咪人人都認得佢，去到邊度都俾人眼望望？」

後記：
有追看《棟篤神探》的觀眾，可能會留意到子華經常穿着一件大褸，當大家以為他為配合劇中的神探形象而穿，他卻自爆其實是懶換衫而已。他說：「過往開工換衫換到暈，所以我今次每五集先換一件，加上角色所需，經常要袋住好多嘢喺身，所以我索性成日着住件大褸，由開工着到返屋企，着足幾個月我都冇洗過。」

睇戲咪駁古
另外，有人質疑每次查案，子華總是與全組探員一起出動，似乎不合情理，對此他笑說：「如果要challenge香港嘅電視劇，咁冇一套可以睇多過兩集，香港劇集係玩劇情，唔玩真實性，總之唔論真確唔論反駁，如果唔係你就係tune錯台。」

採訪：戴彩煥　攝影：陳慧安
髮型：Helen Wong by Beijing Hair Culture
場地提供：馬哥孛羅香港酒店Gripps

Source: http://hk.apple.nextmedia.com/entertainment/art/20040808/4225213