【黃子
華開騷】(注意劇透)一開場講佔中:整「融」定毀「融」
蘋果日報 2014-10-06
子華先倒抽一口涼氣。(攝影:仇志德)(蘋果日報)
黃子華再踏紅館舉行棟篤笑,今晚一開場,就講佔中。「咩時勢呀?仲咁歡樂?成何體統呀?依家仲有心情嚟聽人講笑,呢啲咩人嚟0架真係!講真,冇心情睇嗰啲,就喺嗰個出口(指向出口),就好走喇下,係冇回水0架。如果你想嗌回水呢,依家已經好落後喇,依家嗌回水,不如你試一下:『倒抽一口涼氣』。」全場爆笑。
子華續道:「從來冇試過,萬幾人一齊倒抽一口涼氣,我哋要試下有咩效果好唔好?」還即場教學,一,二,三……「倒抽一口涼氣,係我細個睇武俠小說先睇到呢啲字眼,通常係中咗毒嘅人先會咁講,佢忽然瞓醒,見到有隻西域蜘蛛咬緊佢大髀,忽然倒抽一口涼氣……係咪?呢啲中咗嘅字眼,依家香港成日聽到,香港依家中咗毒。」
「係咪舊年…我都唔記得,太多嘢發生,有個老師,講咗一句粗口,全城又互抽多口涼氣。我記得我細個有個阿sir,佢姓屈,叫特忽,叫屈特忽。梗係好開心啦,好似係你哋咁啦,一上堂,good morning 屈特忽……好好笑,笑兩日乜都笑完啦,第三日已經『good……morn…ing…so…屈……』係咪?香港可以笑一年,香港係有病。香港有咁重嘅病,咁我咪拍套劇,犀利喇,唔拍劇都唔知自己地位,一出街全城罷睇!」明顯就係講緊之前全城罷睇TVB,令《My盛Lady》亦受牽連一事。
子華續道:「香港係有病,而呢個病,係視乎你睇佢有幾輕或幾重,去決定係佔中,定反中——呀,反佔中嘅位置。對唔住呀各位,我今日有嚴重嘅傷風,所以我食咗好重嘅傷風藥,好口乾……」又飲水。
子華繼續話:「即係你係佔中,定反佔中,係睇你,視乎香港呢個病有幾重。我聽過一男一女對話係咁嘅:『你想整容呀?整容可能變成毀容呀!』拿,信呢句話嗰個人,可能就係周融喇,唔好亂搞嘢,『毀融』。」
「咁佔中嗰班呢?你聽埋第二句喇:『你想整容呀?整容可能變成毀容呀,不過對你嚟講都冇乜分別啦。』即係香港點解會搞成咁嘅呢各位?」
Source: http://hk.apple.nextmedia.com/enews/realtime/20141006/52987701
【黃子華開騷】男神教你點為之「好工」 如何戰勝資本主義
蘋果日報 2014.10.06
(攝影:仇志德)(蘋果日報)
現場又有人叫子華「除褲」,佢就話:「咩事勢你仲諗埋晒呢啲嘢嘅...有啲人嘅人生起點係有10億嘅,10億對大部份人嚟講都唔係一個陽間嘅數字啦係咪?因為大部份人真係唔係咁鐘意錢架,我喺網上睇過,何謂一份好工,都係同錢無關嘅,需要有4大條件,都同錢冇關。」
究竟係咩呢,子華話:「一份好工,令你唔怕星期一,星期一啲lift會冧呀?阿強每個星期日晚同我食飯就哭喪咁嘅口面,好似食最後晚餐,因為過多幾個鐘就星期一,就唱歌:『黎明請你不要來~就讓12點一到發生兩次重意外~全公司執晒笠~全香港冇電到~ 淨係淨係出糧~沒有異常(全場爆笑)』 第二個好工條件,肯定比我影響,一份成日打風嘅工,呢啲人見工呢:『貴公司係幾時打風?』人係唯一鐘意打風嘅生物呀知唔知,有人話上帝已死,肯定係俾人類激死架嘛!人類咁邪惡『整個8號風球去教訓下佢哋!』嘩,8號風球 仲要係星期一,感謝主!」(全場爆笑)
子華繼續:「第三好工條件,放工就是放工,老闆不會再兇,呢啲好陰公呀嗌出嚟呢啲,老闆打比你,係咪好想發生事呀? 老闆打嚟『你等一等,屋企有啲野!你哋姓陳呀全家都係衰人嚟架!係咩呀,老闆,佢追緊我呀,阿老闆點呀?有冇事?唔知架!你call我不如報咗警先啦』」
「第四,好經典呀,一份最好條件嘅工,係一份唔使見工就可以返嘅工,嘩你申請做一隻螻蟻,我都要知道你有幾貪心,唔使見工就返得嘅工,即係老闆星期一返工『你係?』『我返緊工!』『你返緊工好呀!咁請問你...』『問野!問野咪即你見工!又話唔使見工!?』『我想請教你貴姓名呀』『我叫馬可孛羅,係咪有人工加呀?』唔係丫嘛,唔係你話之我姓是叫旦,搵食啫!是但啦!」
「呢啲咁嘅o靚仔,無非兩隻字,怕辛苦,唔係呢兩隻字o架『乸型』,唔使見就有得返工,即係唔使拍拖有得洞房啦,喂洞房都好辛苦喎,最好唔使洞房就有仔生啦,啲仔唔使養就大埋,怕辛苦不如唔使大就瓜埋啦!阿爺你唔明新一代,係進步好多,佢知道人一生為咗份工咁勞役係唔值得架!咁呢啲咪資本主義嘅問題囉!咁你要諗下,點樣戰勝資本主義呀?兩隻字『吞pop!』(爆笑)不過都唔啱你哋架啦,因為要識得點樣『吞pop』都好辛苦o架乸型!」
Source: http://hk.apple.nextmedia.com/enews/realtime/20141006/52987778
【黃子華開騷】(劇透)香港俾中國「標參
蘋果日報 2014-10-06
男神子華一開場就講佔中。(攝影:仇志德)
黃子華於今晚棟篤笑中一開場就講佔中同特首夫人「倒抽一口涼氣」,問題原因係香港病得太嚴重,咁點解病呢?子華帶大家回憶番佢97年講過香港「回歸」中國呢句金句:「香港回歸中國,就好似阿媽標個仔參,誰來俾贖金?當時係一個母子關係,當時大家以為係。但係依家已經唔係,變咗係奶奶同新抱嘅關係……依家香港嘅問題,係婆媳糾紛,所謂婆媳糾紛,係一種必然奶嘢嘅關係,係咪?除非你個新抱第一日入門就全心全意同奶奶講:『奶奶,我愛你!』唉呀我講錯,對唔住,講多次,『阿媽,我愛你!』但當然我哋係講唔出啦,仲有啲人話,你俾啲錢佢,叫佢唔好搬嚟一齊住啦。係咪?」
「如果新抱做唔到就除非個奶奶好開通,拿阿家嫂,你唔露三點,你就當係著左衫0架喇,不過你始終唔係我親生,你有你嘅思想,你有你自由,你繼續跌出嚟啦。即係你唔係是旦一個做唔到,就遲早一個反面,一反面啲說話就越來越難聽0架喇!」佢又以奶奶向人投訴新抱成日去「英美超市」搵人哭訴妙論「外國勢力」,你懂的。
Source: http://hk.apple.nextmedia.com/enews/realtime/20141006/52987752
【黃子華開騷】(劇透)「奶奶」唔俾「新抱」揸弗:揸LIFT又係揸,揸住先啦!
蘋果日報 2014-10-06
(攝影:仇志德)(蘋果日報)
頭先講到話,子華形容中國同香港,就好似婆媳關係一樣,佢仲扮晒奶奶腔,人前鬧爆新抱借助「外人(國)勢力」,又妙論「自由行」呢個恩主政策:「咩呀?依家我家族好失禮你呀?你話間屋陰,唔夠人氣,ok,我就叫晒啲親戚落嚟坐,呀…佢話人哋係昆蟲喎!」仲笑昆蟲周街「便便」,全場擊節讚賞。
子華更借助「新抱」把口反擊「奶奶」:「你搞到我全屋傢私變酸枝,但我只係想坐紅A。唔係有錢就大晒!」「奶奶」就教訓番佢:「你第一日入門就藐嘴藐舌,依家你有咩攤晒出嚟講啦!」於是「新抱」就問佢:「咁6月3號之後你去咗邊吖?」全場拍掌。「奶奶」就話:「你講呢啲?」
最搞笑係,「新抱」問「奶奶」話之前明明講好過幾年俾佢「揸弗」,點知「奶奶」話佢聽錯,係揸LIFT唔係揸FIT。兩者分別就係,揸弗的話你可以周圍去,但揸LIFT,就係局限於同一個地方,俾你「上上落落」周圍去…
「奶奶」續道:「揸弗又係揸,揸LIFT又係揸,你唔係有得揸唔揸呀嘩?揸住先啦!」
子華繼續扮「新抱」話喇:「不需多講,佔領廚房」「奶奶」就話:「喂,佔領廚房因住變成困喺柴房呀下!」
此時一直沉默的老公同兒子出場勸交話嫌兩女好煩,子華話:「因為佢兩個成日都沉默,所以佢哋咪『沉默大多數』囉!但係沉默大多數依家已經唔可以咁著數,因為每晚都聽到新抱唱:『試問誰還未發聲…』然後每餐食飯,奶奶又會夾餸俾佢:『試問誰還嫌錢腥!』點解決呀各位?」
Source: http://hk.apple.nextmedia.com/enews/realtime/20141006/52987801
【黃子華開騷】(劇透)梁振英唔識搞民主因為唔夠老婆?
果日報 2014.10.06
(攝影:仇志德)(蘋果日報)
黃子華又借用不丹嘅例子,發明了「國民快樂總值」呢樣嘢,指不丹國王知道國民最快樂就係有民主,所以就俾咗民主佢哋喇。子華又引用不丹國王可以有四個老婆:「係因為人民太愛個老婆,所以想佢娶多啲老婆,多啲種子留低。我就即刻明白咗一樣嘢,你敬我一尺,我敬你一丈。你哋有民主,我食四條魚,所以今時今日喺香港搞民主,我哋係時候認真考慮一個問題,就係我哋個特首唔夠老婆呢?」
Source: http://hk.apple.nextmedia.com/enews/realtime/20141006/52987863?top=4h
【黃子華開騷】(劇透)繼續講佔中 黃子華教特首拆局
蘋果日報 2014.10.06
(攝影:仇志德)(蘋果日報)
黃子華於棟篤笑上講完奶奶同新抱嘅關係,跟手再講佢之前劇集《My盛Lady》一推出就遇上網民呼籲罷睇,依家開騷,又遇著佔中。子華笑言:「其實我都預咗今晚嚟唔到0架喇。咁當然梁振英即刻走出嚟……嗱各位我唔想講太多,我講埋呢幾句我唔講0架喇,我冇預備講呢樣嘢0架嘛!我年半前就準備好晒講乜嘢0架喇,忽然搞啲咁嘅嘢……但唔講我又有啲唔爽,所以俾我講埋呢幾句,ok?」全場尖叫。
「掟咗78枚(應是87枚)催淚彈之後,梁振英就出嚟講喇:『應該呀,警方係用咗適當嘅武力啦!』,葉劉淑儀又出嚟講係適當嘅武力:『啲人有武器0架,有把遮0架喎!』我唔知點解啲高官係咁樣嘅,你唔係與民為善嘅咩?我知道你應保護警隊,但你唔使下下分化得咁緊要。你可以話警隊係專業,我亦相信警隊係專業。但問題係,警隊掟催淚彈唔係專業0架嘛?佢哋掟咗幾多次催淚彈?香港太平盛世幾十年,十年都掟唔到一次,你十年冇煮過一次餸你敢認大廚?」
子華再謂:「如果我係政府,好簡單,當你警隊係專業嘅,但係掟催淚彈,佢哋係比較業餘嘅。冇問題0架,等如抗議班人都係業餘,嗰班人唔係專業抗議者嚟0架嘛。所以業餘對業餘,咁咪一齊誤會囉,和氣生財嘛!做到咁高位都唔識講?『係一場誤會!一場誤會!』咁咪搞掂。」
Source: http://hk.apple.nextmedia.com/enews/realtime/20141006/52987884
【黃子華開騷】(劇透)子華怒撕狼英語言偽術:擺明就係大人打細路!
蘋果日報 2014-10-06
(攝影:仇志德)
頭先黃子華講到,葉劉淑儀指示威者手持雨遮係武器,子華就話:「咁都講得出,唔知葉劉淑儀有冇女嘅呢?如果佢個女夜晚出去蒲,『你去幾耐?』『三日到啦!』『唔得,好危險!』『怕咩啫,我有把遮!』你仲驚,『得啦唔使驚,我仲攞咗好多保鮮紙添呀!』」眾大笑。
「咁樣叫有備而來,葉劉仲有句話『學生不是省油的燈』,又係武俠小說先出現嘅說話,你哋(高官同特首夫人)都係古墓派嘅人嚟0架,你返番入個古墓度啦!即係點呀,『我發現學生不是省油的燈,我不禁倒抽一口涼氣。然後發出689拳,都被雨遮一一擋下!』點會咁樣樣0架?」拍爛手掌。
子華又借老友「阿強」比喻,謂拎遮同保鮮紙咁嘅裝備,莫講話擋催淚彈,鹹鴨蛋都掟得死你。「最緊要咩呀?護陰!」阿強真係買咗幾個,喺旺角大派用場。「男人戴護陰,女人就戴鋼盔(指胸部)。啲人真係咁鬼狼,擺明有組織嚟襲擊一啲和平嘅人,啲人應唔應該佔領條路係另一件事,但擺明就係佢係靜坐喺度然後俾人襲擊。然後梁振英又話喇:『我強烈譴責所有用暴力嘅人!』擺到明就係大人打細路,你就話強烈譴責所有暴力嘅人,點解要咁講嘢?」
子華繼續踢爆梁振英語言偽術:「你叫人返屋企,你咪話旺角我自己都好少出去玩,我個女咁大個都未去過旺角。大家都係想搵我啫,我喺金鐘,come on!get me!係咪?講番啲和氣生財嘅嘢得唔得?」此時有觀眾大叫「生日快樂!」
之後子華再講,政府要面對,香港已進入「催神年代」——催淚彈之神,「佢只係帶住兩把雨遮,啲催淚彈就掟喺佢身邊,so what?當年六四有個人企喺坦克車前面,佢只係夠膽咋;佢(指上咗《TIME》封面那個港人)超越人類極限,佢嘅身體係唔怕毒氣,我唔知係咪佢嗰兩把雨傘可以調整到,解到催淚毒氣。你聽過不食人間煙火,就係佢。」
Video is available in the linik below
Source: http://hk.apple.nextmedia.com/enews/realtime/20141006/52987927
【黃子華開騷】(劇透)行行都有吞pop嘅精英 泌尿科醫生又點呢?
蘋果日報 2014.10.06
子華打工仔look,型唔型?(蘋果日報)
子華繼續講理想嘅工作:「『家家有本難念的經,行行都有吞pop嘅精英』!點解呢,因為真係做每一行,每一份工都好辛苦,就算你話理想嘅工作都係好辛苦,做醫生好理想,好辛苦,成日唔夠瞓,因為病同分手一樣,係好冇時間觀念架嘛。你聽朝早6點半要返工,條友4點同你講『我要分手呀!』...你申請咗幾個月,拎咗大假,聽朝一早去旅行,盲腸炎『陳醫生,你瞓緊覺呀?我盲腸炎呀,我唔係想問你幾時施手術,想問呢盲腸炎呢,可唔可以食buffet呀?可唔可以游水呀?踩單車?最緊要會唔會影響我視力?盲腸喎!有啲嘢盲咗喎!』好多病人最大嘅問題係呢一度(個腦),所以我老友Benjamin,唔係阿強,細個立志要做醫生,做腦科醫生,好勤力讀書,佢考到入去,但腦科滿額,佢只能做泌尿科。」
子華續說:「事實上泌尿系統係人類最複雜嘅一個系統嚟o架,因為你身體其他部份出問題,見到醫生會直接講『身體見邊度有問題呢?』『冇咩呀』『先生你係咪尿頻呀』『唔係呀,好正常呀』『先生,你尿出血?』『冇冇冇』『先生你即係咩問題都冇』『咁又唔可以咁講』講咗半日,『先生你係咪要偉哥呀!』『可以要幾多?金『先生你想要幾多?』『盡要!』前幾日佢話阿爺問我拎偉哥,成百歲,你比佢?...我緊係唔俾佢!問題係我去廁所時佢去我櫃桶拎咗,我阿爺反應:『唔係我食嘅,龜食嘅,龜唔生蛋』我話阿爺隻龜好大年紀,『痴線嘅你,龜會有大年紀嘅咩』,我係今日都俾佢搞到我好混亂,龜係咪唔會老嘅呢,諗起嚟又係喎,未見過龜會死架喎,你邊有養隻龜會死架,你試下俾啲偉哥佢食丫嘛。」
「係好奇怪架,泌尿系統嘅病人唔係一般嘅病人,你身體咁多器官唔會亂咁搞佢架嘛,你唔會得閒冇事,聽講耳膜係好薄架嘛(作狀搞耳膜)真係好薄!Marvelous!你係唔會架嘛,但係人類會對佢個泌尿系統做盡各種實驗,Benjamin比過一份X光片我睇,係一個人飲咗罐可樂,係連埋個罐飲咗,再清淅啲,係用咗一個廣東嘅旅遊名勝,肛門飲左,大約半尺到,個人解釋係,佢唔係有心飲架喎,佢係唔知邊個,擺罐可樂喺張椅度, 佢一坐底就飲咗啦,但係有位叫Benjamin都大開眼戒嘅病人入急症,因為佢尿道係比啲嘢塞住咗,各位係尿道唔係彌敦道,係隔離個條街,窄好多,用內窺鏡一睇,有粒豆咁,有個人形,係孫悟空,齊天大聖,當年被壓喺五指山下已經夠折墮,而家zip喺條尿道中間,Benjamin要做嘅就係用激光打碎佢,係一隻豬!搞咩呀?動物園呀?先生究竟係發生咩事?千真萬確,『我今年犯太歲,我要zip太歲呀,zip隻玉豬囉,隻玉豬唔出返嚟,咪請大聖爺囉,其實預埋唐僧添架啦』一個醫生,一份咁理想嘅工作,你有冇諗過你遇到啲病人係『冇問題...隻龜有問題』Benjamin唔介意,積極研究緊將個電筒放喺尿道度,咁啲人痾夜尿,咪唔使開燈囉!」
Source: http://hk.apple.nextmedia.com/enews/realtime/20141006/52987895
【黃子華開騷】(劇透)子華參與佔旺 見證美麗香港人:勇敢‧和平‧善良
蘋果日報 2014.10.06
黃子華繼續講佔中,不吐不快:「個問題依家就係,有一班唔怕任何嘢嘅人,唔怕催淚彈,唔怕黑社會,我唔知大家有冇去過呢啲抗議嘅地方,呢啲遊行示威嘅地方,我去過。你去咗你唔想返屋企,免費有嘢飲,免費有嘢食。」
「我唔係同你講笑,我嗰日坐咗喺度,隔籬突然有人講,我哋有壽司呀,仲未壞,晏啲唔敢擔保。咩服務呀?你覺得熱,有人埋嚟幫你噴嘢。要唔要凍貼……我唔知世上有凍貼呢樣嘢。『你唔係貼喺額頭,你貼喺頸0架!』我唔知呢個係咪世界紀錄,有個人拎住廿樽水派俾人,不斷跌低,一秒之內樽水去番佢手度,一秒鐘!你係未見過咁多咁義助嘅人!一秒!」子華更大讚抗爭者路不拾遺但執到會物歸原主,故此佢嘅結論就係:「所以我都叫大家唔好去旺角,旺角真係唔係人去0架!」
子華再謂:「要認清呢個事實。咁點呢?證明咗我哋香港人嘅品質,係真係幾咁勇敢,幾咁和平,幾咁善良。我哋今次證明咗嘅,就係證明咗呢啲嘢!而對我哋嚟講,對我哋下一代嚟講,呢方面已經唔需要再考驗,全世界,我哋自己心中有數。未來嘅考驗,就係我哋嘅智慧。智仁勇,仁勇我哋都兼備,未來嘅考驗,係智慧,OK?大家唔使依家諗住,我哋轉話題,唔講住,大家準備倒抽一口涼氣,轉話題,一、二、三!」全場一齊抽萬口涼氣。
Source: http://hk.apple.nextmedia.com/enews/realtime/20141006/52988012
Video is available in the link below